أبحث عن الربيع كي أغزل لك  من زهورة تاجا
لتذكرني بالشذى
تاه الربيع لديك،غلبت غيومك الشتوية الرمادية صفاء زرقة السماء
بحثت عن الزرقة في بحر عينيك
كدت أغرق قبل أن أدنو بخطواتي بعيدا عن الشاطئ
أحب البحر وأخشاه
أحبه من بعيد..يسكن قلبي
حتى أني أستعرت البحر مقياسا للعشق
أعشقك بمقدار عشقي للبحر
هكذا يعرفون أني حقا أحبهم
لا يصدقون عشقي دون ذكر البحر مقياسا له
في البعد يبقى هدير الموج صوتا يناجي الروح
في البعد تبقى رائحة البحر حلما صافيا أصبو إليه
أترى؟!... من جديد نسيت في زرقة البحر في عينيك أني أبحث عن الربيع.

                                                                                                        شيماء أحمد

الخبر نفس الخبر

أنا نفسي أقول كلام متحني بلون الحب والأحلام
وكل ما أمسك القلم تحاصرني جيوش من الأحزان
يمكن تقول طبعي النكد بس الأكاده ان أنا
طول عمري عايشه في غفوتي
سارحة هيمانه حالمه
فاكرة الحياة دي طيبه وصديقة صافيه قريبه
ولجل القسمة وحكم القدر
سمعت في النشرة الخبر
و بعدها وقعت في أيدي نشرة ال............
لا مؤاخذة جرنال..بس مش أي جرنال
جرنال الحكومه بيقول: كله تمام كله عال العال
لحد هنا مفيش مشكله .ممكن أقول كلام الحب والأحلام
بس قلبت على محطة غير محطة كله تمام
متذاعة من نفس البلد بس الخبر غير الخبر
مع انه والله نفس الخبر
عندنا بيقول تمام وعندنا برده بيقول على الدنيا السلام
عجز القلم عن الغرام
وقال كلام غير الكلام
قال ليه الوجع والكذب والإمتهان من غير سبب لكرامة الإنسان

                                                                                   شيماء أحمد
                                             

يا صاحبي ليه؟!......

وشوش الناس بتتلون.. دا شئ عادي
لكن صديق العمر لما يتلون على صاحبه
دي تبقى النار على الهادي
وجع في الروح وعمر ضاع على الفاضي
سامع خطانا في كل سكه بتنادي
وبتلومنا على جحودنا لذكرى حلوه جمعتنا
ولكن هو موش سامع أو عامل روحه موش سامع
بيتلون عليا أنا وأنا صاحبه
كلامه لما يتلون على الدنيا كلها يعدي
لكن لحدي يا صاحبي أقف هدي
أنا فاهمك من لفتتك بعرف ..ايه فرحك وايه همك
ليه بقيت لما تتكلم يفوح الكره من حنكك
دا أنا صاحبك وعمري بطوله وانا جنبك
يا صاحبي داري وأخدعني ..حاسسني بأني انا الغلطان
خليني أبوس على راسك وأقول ندمان
دا أنا حطيت طوبه على طوبه في محبتك صبحت بنيان
وانت زرعت السوس في محبتك طرحت بهتان
لفرحتي ليه اتنفضت ..نفضتك مليت الهوا ريحه عفن
يا صاحبي سممت الهوا والعشرة والعمر اللي فات
يا صاحبي هو انت كنت صاحبي والزمن قساك
ولا عمرك ماكنت صاحبي
وأنا اللي عشت عمري  متغمي
وجاني اليوم دا  ينورلي
يارتني فضلت في الضلمه وبقيت صاحبي
ولا فتحت لجل تكون يا صاحبي سبب همي

                                شيماء أحمد

حسيت بأيه؟….

لما النار تلمع في عينك تسعدك
ومتشوفش منها الا نورها
وتعمي با لقصد عنيك عن نارها
ماسكها بأديك غافل انها كل ماتعلى وتلمع بتقرب على يدك
راح تلسعك او تحرقك
انت ونصيبك او قول انت وغفلتك
حسيت بأيه وهي بين اديك نارها كانت بتريحك
كنت بردان محتاج الدفا
ولا بتتحرق ونفسك تشوفها بتتحرق
ولا الظلام كان السبب
كان نفسك يعني في ضيها
طب نورت …وشفت ولا لهيبها جاب سحابه على عيونك ضلمت
شيماء أحمد

مداين العشق

مداين العشق بتتولد في سكون
في غفله من الزمن والعتمه ساتره الكون
يسحب شعاع الشمس عنها الغطا
تتبدد كأن لم تكون
يتشردوا سكانها من كل شكل ولون
دقات قلوبهم عاجزة تترجم المكنون
خوف..شك…يمكن ظنون
وسؤال يزن في الودان بجنون
العتمه كانت في عيني ولا في كل الكون
اتبعترت اوراقهم يمين وشمال
طارت ذي مداينهم ومعاها الف احتمال
مش فاكرة منهم ولا واحد واني افتكر دا شئ محال
حالهم صبح عدم من كترة الاسفار
شالتهم بلاد وحطتهم بلاد
وفضلوا تايهين بيحلموا بميعاد
تعتم الدنيا فيه وتعود مداينهم وان شمس الكون شقشقت هيعتموا عيونهم
شيماء أحمد

لسه الصراخ مسموح

انا عايزة اقول مش عارفة اقول
مش قادرة اقول او عاجزه اقول
مر الكلام على اللسان لو كنت راح أقوله
علقم على روحي لو وحدي راح أشيلة
أوقات أحب أبوح ألاقي قلبي حزين ملاه النوح
يمكن لعجز روح ساكنه مدينه متحوطه بجروح
تنزف…ماتلاقي مين يداويها
سال دمها…نشف……صبحت جسد بلا روح
احساس مفيش هيجي منين والروح والقلب متكتفين
أو يمكن كانوا مصلوبيين
شفتهم في دمعة نشفت جوا عيني …متقطعين….متنكلين
على بوابه مدينه تنبه الجايين :ممنوع تكون بقلب وتدب أرضي بالقدميين
اه من قلبي وهو حجر عاجز يحس عاجز يبوح
كرهته عمى …ما اعرفش أعيش وأنا روحي متألمه
بودي أبكي بس البكا ممنوع
سمعت صراخ بعلو الصوت ..لسه الصراخ مسموح
في مدينه عاجزه تعيش  و مش قدرها تموت
يبقى أسمحولي أقول أه وأه واه…………….بعلو..علوالصوت…………..
شيماء أحمد

والله حاجه تغم

لم ولم ولم كوش وحوش يا عم

كل اللي نجمعة بالشقا وطفح الدم

كوش ولم وان شا الله تطفحه بالسم

ياغراب يا جالب للغلابه الهم

كوش ولم بس الحقوق ولا بد يوم تترد وحتما عليك ترد

فين الحقوق عندكش لينا رد

طنش وغض وغلوش وأوعاك ترد

أصل لو يوم ترد تنطق بذنب تنطق بفجر تنطق بجهل

هتقول أيه ريان يا فجل

ما أنت الوصي على الشقا رغم الأنوف رغم الألوف قول شرذمه حاقدة قول قله مفسده

وكوش ولم....................................

أتكسف أتلم والله حاجه تغم

أسمك يساوي اللي  يزيد عن قدرتي واللي ما أطوله بضعفي وقله حالي

عملك عمل أسود يشهد عليه حالي

يا سفيه مين عينك وصي على مالي

                                                                                 شيماء أحمد

                                                            

ياسلام سلم

ياسلام سلم قول واتكلم

وأنا راح أرد وأقول يا سلام

أما كلام قولي يا سيدي ..قولي كمان

قول كان لازم والمفروض افكار عشش فيها الدوود

ساكنه في بيت العنكبوت

قول دا قانون طبعا معلوم

أنا جتلك في الصبحية هادية ورايقة ذي نسيم الصبحية بنت عادية

في الضهرية بعد الوشوش النكدية اللي بهمومها معبيه

مع الزحمه مع الدوشة مع الغباوة الروتينيه

بقيت سوقية وهمجية ...زعابيب أمشير بالرمل معبيه

ليل علينا الليل شوفه في حضن النيل ميل

حلف عليا ما أميل وقالي لازم تتغير كل التوابيت الحكوميه

كره اكون بنت عادية حلفني أحب الحريه

قالوا براويه قالوا مجنونه قالوا خارجه عن الحدود

قالوا بتسهر للصبحيه ايوه بسهر للصبحيه

 وأحلم أحلام مش عادية

وأفكر في الفكرة تجيني والصبح تتحكم فيا

تتمرد على كل المفروض وعلى الوشوش النكدية

عشان أعيش بحريه  ويكون ليا أيام جاية

وماروحش بسكته قلبيه جوة المصلحة الحكومية

                                                                                                  شيماء احمد

أنا نفسي ف توت

ليلى غفيت زعلانه ف حضن دموعها غرقانه

من قبل الليل مايليل انا قلت عليها أميل وأسأل من أية زعلانه

ليلي ردت وقالت :أنا نفسي ف توت أنا أصلي حقيقي بحب التوت

قام حارس الغيط عب موجود طلع وضربني بالنبوت

قالي مش حقك تقطفي توت وانا نفسي جدا أدوق التوت

انا قلتله ليه يا عب موجود!!!!؟

قام بصلي بصة مش ولا بد وقالي يابت مايصحش تيجي وتقطفي توت

قلتله طب هات لي يا عب موجود أنت وخلاص حبة توت

ولا حتى بدة رضي عب موجود

وانا نفسي ياعالم ادوق التوت

فكرت أفهم عب موجود ان انا خفت من النبوت

و أحود من عند بهانة وأعدي الغيط وأقطف توت

أنا أصلي نفسي أدوق التوت بس وميلت على بهانه

لقيتها ياعيني غلبانه بالمر كيعانها مليانه

آل عب باسط جوزها أتجوز بعدماصبرت هي معاه قوم لما ربه بسطها عليه

يوجعها و آل أيه مرضانه

دي خيبه أويه يا عب باسط

مسكينه يابهانه وغلبانه وبالمر كيعانك مليانه

بس أنا نفسي أدوق التوت ولا ممكن أتنازل عن قطفه لو حتى هخانق عب موجود

طب فين السكة يا ليلى اللي توديكي على الغيط من غير مايشوفك عب موجود

هو وابور الطحين واهو عندو الناس مرصوصين لجل الخبيز والعجين

رحت وابور الطحين لقيت فتحية ماسكه في خناق ام ياسين

معقوله يا خالتي فتحيه في خناق بعضكوا ماسكين ماهو كله هاياخد طحين

قوم ردت خالتي ام ياسين بلا نيله خلينا ساكتين

بقى هو فين الطحين ماهو من همنا كلنا ف بعضنا يمكن نوصل للطحين

معقولة وابور الطحين مابقاش فيه حبة طحين تكفي دول الجعانين

طب أقول لمين ونجيب منين ياعم يا بتاع الطحين حبة طحين لجل الخبيز لجل العجين

أنا أيه خلاني جيت هنا انا عايزه التوت انا نفسي يا عالم ادوق التوت

خلاص راح اعدي جزيرة الورد واروح الغيط انا واقطف توت

وعليها ورحت جزيرة الورد مالاقيت الورد

لقيت فيها غول عشش في الأرض وخلاها بور

آل ايه راح يبني قصر مهول

الفين ندامه ع الزهور

أنا ايه جابني من هنا انا نفسي ف توت أنا عايزةالتوت

ليه بس واقفلي يا عب موجود

خليني اطول حاجه واقول انا كلت التوت وقطفلي منه عب موجود

أنا رحت الغيط ما لقيت التوت كان قطفه كله عب موجود

وانا عايزه التوت انا نفسي ف توت لوحبة توت

وبلاش نبوت ياعب موجود

انا ليا حق دي ارض ابويا وانا بيها احق

ازاي يحرمني ادوق التوت

خليكوا شاهدين على عب موجود

شيماء أحمد

كان يا ما كان

قالوا لنا أيه كان ياما كان أيام زمان

لا....وكمان الآن حدوته واحده نرضعها بعد الفطام

حلم الأمير فوق الفرس لما يغافل الحرس ويخطف أميرته على الحصان

للقصر في أبعد مكان

وبعدين هيحصل أيه كمان

لحد هنا خلص الكلام والكل نام

ليه ياترى فضلت عمري كله متحيرة

بعد الفرس والحرس والقصر وحلو الكلام في ايه كمان

أنا خلاص عرفت في ايه كمان بقالي حبه من الزمان

والنهاردة حنة بدريه والقمر في السما بدر التمام

وجوة البيت الفرحه ماليه المكان غنا ورقص وضحك وابتسام

وحنه على الأيدين والقدمين للحبايب والصحاب ومالينا دعوة باللي غاب

اليوم فرح ومالينا دعوه بأي شئ يعكر جو المرح

للفرحه دي مليون سبب وعند كل واحدة مننا أكيد سبب

بس مش لازم سببي يكون نفس السبب

في واحدة فرحانه بجد من قلبها ودي نونو لسه في حضن امها

وواحدة فرحانه عشان بدريه كانت همها

كانت عيون الخطاب عليها وكلهم طالبيين أديها

بس خلاص بدريه انزاحت والبنت ارتاحت

وواحدة فرحانه عشان طنط محاسن ام حسن بصتلها يمكن تخطبها لأبنها

ودا بس هو همها ولا غيرة شئ بيهمها

وواحدة فرحانه عشان نفسها تشوف بدريه في بيت العدل

بتحبها اي والنعمه بتحبها

وانا كمان بحبها

بس في حاجه في قلبي وضميري بتقولي اني بخمها

يعني لو اسكت وأكتم اللي في قلبي عنها أكيد هكون بخمها

طب أقولها..أقولها أيه ....يتقال ازاي

عمري ما فكرت يتقال ازاي

بس أتخيلت قدام الحي البنت فهيمه المنكوشه سارحه بربابه وبتغني

الوي الوي ياأمي الوي الوي
والحنه في ايد الصبيه شوي شوي
الوي الوي والزفه واخده الصبيه ع الصعب الجاي
الوي الوي ياأمي وتقولي لمين ماهو مهما تقولي ياأمي ما فيش سامعيين
الوي الوي يا أمي وأنا ست الدار الوي الوي ياأمي على شغل الدار
الوي الوي ياأمي قدام النار
الوي الوي شقا ليل ونهار
الوي الوي وراح أشكي لمين
قالوا اللي بيشكي من الضالين
الوي الوي ياأمي والحبل صعيب
الوي الوي ياأمي والضنا دا لهيب
دا وجعي وماشي يا أمي حافي القدمين والأرض الأرض يا أمي تجرح الاتنين
والوي الوي يا أمي على سيد الدار الوي الوي داير من دار
ودا طبعه صعيب ياأمي محتاج مكاتيب ليل ويا نهار
والوي الوي والعمر اهو ماشي
والوي الوي ياأمي وأنا عندي صبية والحنه في أيد الصبيه شوي شوي

اسم الله عليا قالوا السكوت من دهب يبقى راح أسكت

وضميري راح يسكت ولو يوم وزني راح أقوله راح تفرح لما تعملني فهيمه و على الربابه أغني

بدرية فرحانه وكلامي مش هيخليها زعلانه هتقول غلاويه متكاده ليا مش فرحانه

خدتها بالحضن والدمعة فرت من عينيا دمعة فرحة فيها ولا ليها أنتو اللي تقولوا بس لو كنتم عرفتم أيه بعد حلم الأمير فوق الفرس لما يغافل الحرس ويخطف أميرته على الحصان.






شيماء أحمد

هنادي ياأمي.....

هنادي وجعت قلبي يا امي ومش عارفه اعمل لها ايه
هنادي ندى الفجرية فوق ورق الشجر الأخضر
هنادي الوردة البلدي الفواحة اللي عبيرها يملا الغيط ويفيض
هنادي البنت المتعايقة اللي رايدها كل ولاد الحي
هنادي صبية مليحه ما ليها في البنته ذي
هنادي وجعت قلبي يا امي ومش عارفة اعمل لها ايه
هنادي من بدري يا امي لفت على رقبيها طوق ياسمين
قلتلها بدري عليه قالتلي بدري ليه
هنادي يا امي
الطوق اللي كانت فرحانه بيه
اتقلب لحنش على رقبتها كمش
الخوف سكن في عيونها وبدنها ضعفه هزمها
هنادي ياأمي اسيبها تروح مني ..هنادي بتروح... هنادي ياأمي
جريت أنا عليها وبسرعه على رقبيه لفيت انا اديا
ورميته لبعيدوفديت البنيه
هنادي اتعجبت وبحيره سألتني
ليه الياسمين حولين رقبتي بقى حنش
وليه عاوز يموتني
هنادي ياأمي وجعت قلبي ومش عارفه أقولها أيه
هنادي راح تجري وتجري وبتجري
وطريقها مش وردي
هنادي بتخبط وتعافر وتتخبط
راحت طريق لقيت فيه شجر عتيق جذوره ضربت الأرض من سنين وسنين
جذوره تحت تحت في قلب الظلام ساكنين
سدت طريقها وايد هنادي رقيقه ما تقدر تزحزح غصون الشجر
تحاول هنادي تعافر هنادي واعافر معاها
لكن الشجر ما يتزحزح شجر عتيق ما بيطرح على غصونه غير الشوك وما راضي يتزحزح
أبعد يا شجر عن هنادي أبعد أغصانك مش اقوى من عنادي
ولا يهمك يا هنادي هناك طريق جديد بادي وقريب من الوادي
هنادي لمحت بعينها الطريق لقت بدايته معلومه لكن نهايته ملغومه بشيب وكله في علم الغيب
مشيت هنادي.....ومشيت...وبصتلي وقالت دا طريق ما لوش اخر واصبرها
ويجي الليل ويروح وبعده يطل نهار ويروح
وهنادي ساكته بالوجع ماتبوح
بس شويه تروح يمين وبعده شمال بتروح
والحيرة وخداها
هنادي يا أمي وجعت قلبي والروح
هنادي يا أمي قلبها مجروح
يارب عليك وحدك أنادي وأقول أرحم هنادي ووريها طريق مفتوح على الوادي



شيماء أحمد